Ripuhna jadi petani
Sholatna ukur wengi
Komo deui mangsana panen
Sholatna teh loba liren
Ripuhna jadi panyawah
Sholat sawayah wayah
Komo deui mangsana tandur
Sholatna teh diundur-undur
Ripuhna jadi pajabat
Mikiran nasibna rakyat
Komo deui mangsa pamilu
Sholatna jarang kaburu
Ripuhna jadi supir
Sholatna jarang kapikir
Komo deui loba panumpang
Sholatna loba kasarang
Ripuhna jadi kuli
Sholatna mineng lali
Komo deui keur loba tugas
Sholatna mineng laleupas
Kadang wargi sareng dulur
Sanajan sibuk ngatur
Sholat mah ulah kaliwat
Meh salamet dunya akherat
Naon wae profesina
Tong lali kana tugasna
Tujuan akhir sadayana
Hoyong salamet dugi ka surga
Kade ulah kabobodo
Ku dunya nu matak poho
Urang kabeh bakal maot
Mayunan akherat kacida abot
Kade petot kana syukur
Kade bisi ujub takabur
Loba jalma anu luhur
Poho kanu Maha Luhur
Sing hormat ka ulama
Mantena warisan anbiya
Nu ngajarkeun rupa ibadah
Taat ka Allah wa Rosulullah
Tingkatkeun kaimanan
Sampurnakeun rukun islam
Lempengkeun patekadan
Sangkan bagja kabagean
Ati ati kanu anyar
Loba pisan kelompok sasar
Pancegkeun kayakinan
Ulama jadi panutan
Pasukan kudu kuat
Ngalawan aliran sesat
Kade urang bisi kabengbat
Ku jalma jalma nu kawalat
Akidah ahlusunah
Tuluykeun wal jama'ah
Tuturkeun para guru
Ngahiji dina NU
Urang mah jalma bodo
Tapi ulah katotoloyo
Usahakeun jadi jalma ngarti
Sangkan jadi jalma surti
Sing cinta ka ajengan
Nu muruk kebeneran
Nu Ngajarkeun akhlakulkarimah
Ngajarkeun cara ibadah
